Қалалық мәслихаттың депутаты Сайфудин Хамхоевқа халық сенеді. Ақмола өңірінің тумасы, Заречный совхозының бас инженерлігінен өрлеп, нарық заманында «Беркат» көп салалы консорциумын құра білген іскер азаматпен мәслихаттағы қоғамдық жұмысы жөнінде әңгімелесудің орайы келді.
– Сайфудин Сұлтанұлы, алдымен сіз сайланған округтың қазіргі жай-күйімен таныстыра кетсеңіз….
– Сенімге селкеу түсірмеу елдің көз алдында жүрген азаматтар үшін үлкен жауапкершілік жүгін артады. Қалалық мәслихаттың төртінші шақырылымында абыроймен қызмет атқардым, қазір осынау қоғамдық жұмысым бесінші шақырылымға ұласты. Мүддеміз мен талап-тілектерімізді қорғайды деген үмітпен көпшілік дауыспен мені сайлаған №20 округта шамамен 25 мыңға жуық халық тұрады. Айта кетерлігі, №1 және 2-шағын аудандар – қаланың 1970 жылдары салынған тарихи бөлігі. Сондықтан, бұл жерде байырғы тұрғындар басым, сонымен қатар, еліміздің әр түкпірінен Астанаға арман жетелеп келген жігерлі жастар да аз емес. Яғни, бір сөзбен айтқанда, округтегі тұрғындардың дені – орта табысты қызметкерлер мен жұмысшылар.
– Олар сіздің көмегіңіз бен кеңесіңізге көбінесе қандай мәселелермен жүгінеді?
– Мен сайланған аумаққа қарасты үйлердің басым бөлігі тозған, сол себептен тұрғындар көбінесе тұрмыстық, коммуналдық мәселелер бойынша көмек сұрай келеді. Айына екі мәрте сайлау округында қабылдау өткіземін және бір мәрте ПИК төрағалары және тұрғындардың қатысуымен жиналыс ұйымдастырылады. Арыз-шағым, талап-тілек сол жерде айтылады.
Бір қуантарлығы, соңғы үш жылда аулаларды абаттандыру, сондай-ақ, үйлер мен жылу-су магистралдарын күрделі жөндеуден өткізу бағдарламасының арқасында орасан шаруа атқарылды, оның нәтижесін жыл сайын ұйымдастырылатын «Аула мерекесінде» айтамыз.
Одан бөлек, денсаулық сақтау, білім беру, жолаушылар тасымалы, жұмыспен қамту, баспана алу, балабақшадан орын алу мәселелері бойынша кеңес, жәрдем сұрап келушілер көп. Тиісті мекемелерге сұраныс жолдап, шешімін тез арада шығару күн тәртібінен түспейді.
– Сіз мәслихаттың бюджет, экономика, өнеркәсіп және кәсіпкерлік жөніндегі тұрақты комиссия төрағасының орынбасарысыз. Комиссия отырыстарында соңғы кездері халыққа қандай шарапатты шешімдер қабылданды?
– Әлгінде өзіңіз айтып өткендей, комиссия Қаржы басқармасының жұмысына қатысты мәселелерді көбірек қарайды, яғни, бюджеттің орындалуы бойынша мемлекеттік саясаттың мейлінше кідіріссіз, кемшіліксіз жүзеге асуы мен қаланың коммуналдық меншігіндегі мекемелердің жұмысын қадағалайды. Одан бөлек кәсіпкерлік субъектілерінің атқарушы органдарымен өзара ықпалдаса жұмыс істеуін жетілдіре түсу, Астананың азық-түлік қауіпсіздігін қамтамасыз ету – басты назардағы мәселе. Тіпті, Қала құрылысы және сәулет басқармасының ұсынған жобаларын електен өткізіп, елорданың заманауи инфрақұрылымын дамытуға да азды-көпті үлесімізді қосып жатамыз. Осыған қарап, депутаттардың жұмысы күн сайын өзгеріп жатқан Астананың даму динамикасымен бір тізгінде келе жатыр десем артық айтқандық емес.
Бір жағынан перзенттік парыз деген болады. Ес біліп, еңбекке араласқаннан бері осы қаланың ұшқан құстай көркеюі, өсуі-өнуі көз алдымда. Елорда ретінде алғашқы қалыптасу қадамдарына қосқан үлесімізді өкімет жоғары бағалады. Алдағы «EXPO-2017» халықаралық көрмесін абыроймен атқару, Президент айқындап берген «Қазақстан 2050» стратегиясын барлық салада ілгерілету – біздің де үлесімізге тиген асыл борыш.
Дайындаған: Гүлбаршын Өкешқызы