Елордада «Әділет органдары кеңес береді» атты республикалық акция басталды. Шара барысында заңгерлер, сот орындаушылар, нотариустар және адвокаттар қала тұрғындарына құқықтық тұрғыда кеңестер береді.
Кеше қала іргесіндегі Күйгенжар кентінде жергілікті тұрғындармен кездесу өткізілді. Алматы ауданының №1 Халыққа қызмет көрсету орталығында ашық есік күні ұйымдастырылды. Аталмыш шаралар барысында көптеген адамдар құқықтық тұрғыда өздерін толғандырған сауалдарға жауап алды.
Бүгін акцияға қатысушы мамандар ЕЦ-166/22 түзету мекемесінің сотталғандарына тегін құқықтық кеңес береді. Сонымен қатар, сағат 15.00-де Астана қаласының №6 кәсіптік-техникалық колледжінің студенттерімен кездесу өтеді.
Ал ертең акцияның соңғы күні сағат 11.00-ден 13.00-ге дейін «Нұр Отан» халықтық демократиялық партиясының Астана қалалық филиалының ғимаратында қала тұрғындарын қабылдау жүргізіледі. Әділет департаментінің ғимаратында жас жұбайларға арналған ашық есік күні ұйымдастырылады. Бұл шара сағат 15.00-де басталады.
