Елімізде тағдырдың жазуымен өмірін абақтыда өткізіп жатқандар жетерлік. Ал оларды тәрбиелейтін – еңбек. Астананың «Конгресс-холл» сарайында өткен көрмеде түзеу мекемесінде жұмыс істейтін сотталған азаматтардың бұйымдары ел назарына ұсынылды.
Сотталғандарды жұмыспен қамту – күн тәртібіндегі мәселе. Олардың бостандыққа шыққан соң табыс көзін іздейтіні белгілі. Сондықтан оларды түзеу мекемесінде жүріп еңбекке баулу қоғам үшін пайдалы болмақ.
Астана қаласының іргесінде орналасқан түзеу мекемелерінде еңбекке жарамды азаматтарды жұмысқа орналастыру жақсы жолға қойылған. Мәселен, жыл басынан бері еңбек етуге қабілеті бар 847 адамның 599-ы жұмыс істейді. Атап айтқанда, «Еңбек» кәсіпорынында 382 адам жұмысқа тұрса, 50 азамат шаруашылық қызметпен айналысады.
– Елорда маңындағы ЕЦ-166/5 абақтысында отырған 308 адам еңбекке жарамды. Қазіргі уақытта олардың 65,9 пайызы еңбекпен қамтылған. Олар наубайханада, өндіріс орындарында жұмыс істейді. Олар бетон өндіріп, түрлі бұйымдар шығарады. Ал ЕЦ-166/10 абақтысында 266 адам жұмыс істейді. Сонымен бірге, мекемедегі 12 шағын және орта кәсіпорыны 87 сотталғанға жұмыс тауып беріп отыр, – дейді Қылмыстық атқару жүйесі комитеті Астана қаласы бойынша департаментінің бас маманы Гүлмадина Аханова.
Тұрғындардың назарына ұсынылған көрме тауарлары көздің жауын алады. Темірден және ағаштан жасалған бұйымдар, теріден тігілген сырт киімдер, құрылысқа қажетті тауарлар сапалы екенін білдіріп тұр.
– Сотталғандарды жұмысқа тарту – Елбасы Жолдауында айтылған негізгі бағыттардың бірі. Бүгінгі шараның мақсаты да олардың еңбегіне қоғам назарын аударуды көздейді. Қазіргі уақытта сотталғандардың
71 пайызы өндіріс орындарында жұмыспен қамтылған, – дейді «Еңбек-Аршалы» филиалының директоры Қанатбек Тұрсынұлы.
Гүлмира ШАРХАНҚЫЗЫ
