Жаны жайсаң жан еді…
2016 жылғы 3 шілдеде көрнекті мемлекет қайраткері, халқымыздың аяулы қыздарының бірі Қайырбекова Салидат Зекенқызы мезгілсіз дүниеден өтті.
1961 жылы 1 тамызда Қарағанды облысында дүниеге келген. Ол 1984 жылы Қарағанды мемлекеттік медицина институтын «Емдеу ісі» мамандығы бойынша, 2002 жылы Е.Бөкетов атындағы Қарағанды мемлекеттік университетін «Құқықтану» мамандығы бойынша бітірген.
1984-1998 жылдары Қарағанды облысының медицина ұйымдарында дәрігер-невропатолог, Қарағанды көп бағдарлы емдеу-диагностикалық бірлестігінде бас дәрігердің орынбасары болып еңбек еткен.
1998-2001 жылдары Қарағанды облыс Денсаулық сақтау басқармасының медициналық көмекті ұйымдастыру бөлімінің бастығы, Қарағанды облыстық еңбек, жұмыспен қамту және халықты әлеуметтік қорғау басқармасының №5 медициналық-әлеуметтік сараптама комиссиясының төрайымы, 2001-2004 жылдары Қазақстан Республикасы Денсаулық сақтау министрлігінің бөлім бастығы, басқарма бастығы, Емдеу-профилактикалық жұмыс департаменті директорының орынбасары, Аппарат басшысы қызметін атқарды.
2004-2006 жылдары Қазақ мемлекеттік медицина академиясының проректоры, 2006-2008 жылдары Қазақстан Республикасының Президенті Әкімшілігінде әртүрлі қызметте, 2008 жылғы 4 желтоқсаннан бастап Қазақстан Республикасы Денсаулық сақтау министрлігі Медициналық қызмет көрсету саласындағы бақылау комитетінің төрайымы, 2009 жылғы 5 қазаннан бастап Қазақстан Республикасы Денсаулық сақтау министрлігі Медициналық қызметке ақы төлеу комитетінің төрайымы, 2010 жылы вице-министр болып еңбек етті.
Салидат Зекенқызы Қазақстан Республикасы Президентінің Жарлығымен 2010 жылғы 7 қазанда Қазақстан Республикасының Денсаулық сақтау министрі болып тағайындалды. Оның отандық медицина саласын өркендетуге қосқан үлесі өлшеусіз. Арамызда болса, әлі талай игі істердің басынан табыла беретін еді. Амал қанша…
Қазақта «Өмір бар жерде өлім бар» дейді. Тағдырдың жазуы осы болар.
Астана қаласының әкімдігі марқұмның туған-туыстары мен жақын-жораларына қайғырып, көңіл айтады. Салидат Зекенқызының жатқан жері жайлы, топырағы торқа болсын.