ЖОЛ ЕКІ АПТАҒА ЖАБЫЛАДЫ
Жылумен қамтамасыз ету жүйесін қайта жаңғырту жұмыстарына байланысты Кенесары көшесінің Бейбітшілік және Желтоқсан көшесіне дейінгі көлік қозғалысы екі аптаға жабылды.
Аталмыш көшелерде қызу еңбек басталып кетті. Астана қаласы Энергетика және коммуналдық шаруашылық басқармасы бастығының орынбасары Ермекбай Сәтеміровтің айтуынша, жаңарту барысында дизоляцияланған құбырлар қолданылмақшы. Олардың диаметрі 300 мм-ден 500 мм-ге ұлғайтылып, тиімді жылу жабдықтармен қамтамасыз ету көзделген. Құбырлардың жылу өткізу қабілетін ұлғайтумен қатар, зияндылығын төмендету қарастырылуда. Аталмыш жұмыстарды жүргізуді «Астанаинжкомстрой» мердігерлік ұйымы қолға алған. Бүгінде 7 құрылыс техникасы мен 20-дан астам білікті маман жылу жүйесін жаңарту үшін білек сыбана кірісіп кетті.
Астана қаласы ІІД Жол полициясы басқармасы қала тұрғындары мен қонақтарына балама қозғалыс бағыттарымен жүруді ұсынуда. Жол бақылау бөлімінің бастығы Нұрлан Уваев жол белгілерін және жол полициясы қызметкерлерінің талаптары мен нұсқауларын қатаң сақтау керектігін алға тартты. 31-тамызға дейін жалғасатын құрылыс жұмыстарына байланысты бұл бағытта қатынайтын №1, 9, 17, 18, 23, 25, 31, 32, 37, 47, 112 автобустар енді Кенесары – Республика даңғылы – Абай – Желтоқсан – Кенесары көшесіне шығып, одан әрі бұрынғы маршрутымен жүретін болады.
Гүлмира АЙМАҒАНБЕТ