Желаяқтар жарысы
Astana Run Challenge атты жүгіру жарысының екінші кезеңі елорданың орталық саябағында жалғасты.
Спорттық іс-шараның ашылуына Астана қаласы әкімінің орынбасары Ерлан Бекмұрзаев, Астана қаласы бойынша триатлон федерациясының президенті Евгений Больгерт қатысты.
Astana Run Challenge екінші кезеңі аясында қалалық триатлон федерациясы және Mega Kids балалар орталықтары мен балабақшалар желісі бірлесіп, айтулы мереке қарсаңында түрлі түске боялған балалар жарысын өткізді.
Ұйымдастырушылардың айтуынша, жалпы қашықтығы 500 метрді құраған жарысқа 14 жасқа дейінгі 270-ке жуық жасөспірім қатысты. Мәре сызығын кесіп өткен әр бүлдіршінге арнайы медаль, ал жеңімпаздарға естелік сыйлық табысталды.
– Мамыр айында өткен бірінші кезеңге 300-ден астам желаяқ қатысса, екінші кезеңде 700 спортшы белсенділік танытып, жүгірді. Бұл жарыстың танымалдылығы артып, ауқымы кеңейіп келеді, – дейді Евгений Больгерт.
Бірінші кезеңде желаяқтар Ботаникалық бақта жүгірсе, үшінші кезеңге қатысатын атлеттер Триатлон саябағында жалғастырады.
Аstana Run Challenge-дің жеңімпаздары жас ерекшелігіне қарай 18-29, 30-39, 40-49, 50-59, 60+ анықталып, арнайы сыйлықпен марапатталды.