Астана
Елордада Astana Media Week форумы басталды. Орталық Азиядағы ең ірі медиа апталық елімізде екінші рет ұйымдастырылып отыр. Ауқымды шара 28 қыркүйекке дейін жалғасады. Оған 2000-нан астам қонақ, қазақстандық және шетелдік медиа индустрияның 60 топ-менеджері, 50-ден аса продакшн-компания қатысуда.
Жамбыл облысы
Таразда «Жігіт сұлтаны-2018» байқауы өтті. Екі кезеңді жарысқа 18-29 жас аралығында облыс аудандары мен жоғары оқу орындары студенттері қатысты.
Түркістан облысы
Тоғыз жолдың торабында орналасқан Арыс қаласына алғаш рет көгілдір отын тартыла бастады. Сонымен бірге, Ақдала және Қожатоғай ауылдық округтеріндегі елді мекендеріне табиғи газ құбырлары тартылды. Бұл жұмыстарға облыстық бюджеттен 88,9 млн теңге қаржы жұмсалды.
Ақтөбе облысы
Облыс орталығында бала тәрбиесіне салғырт қараған 2500 ата-ана әкімшілік жауапкершілікке тартылды. Жыл басынан бері 36 адам ата-аналық құқығынан айырылған.
Маңғыстау облысы
Ақтауда биіктігі 5,2 метр, ені 6,2 метр, ал ұзындығы 60 метрлік түрлі түсті шамдармен көмкерілген арка пайдалануға беріледі. Құны 23 миллион 477 мың теңге тұратын құрылым қаланың сәулетін арттыратын болады.
Қостанай облысы
Облыс орталығында зияткерлік меншік құқын бұзу дерегі бойынша құны 300 мың теңгенің контрафактілік тауарлары жойылды. Әлемге белгілі брендтердің таңбасымен сатылымға қойылған 170 дана тауар шынжыр табанды трактормен тапталды.
Қызылорда облысы
Ақай мен Төретам елді мекендерінің тұрғындары Байқоңыр қаласының емханасына тіркеледі. Бұған дейін Қармақшы ауданына қарасты аталған елді мекендердің тұрғындары медициналық қызметі пайдалану үшін 90 шақырым қашықтықтағы аудан орталығы Жосалы кентіне баруға мәжбүр еді.
