АҚМОЛА ШАРУАЛАРЫ ЖАРЫЛҚАДЫ
Астана қаласында Ақмола облысының күндерi болып өтті. Тәуелсіздіктің 25 жылдығына орай «Қуатты өңір – қуатты Қазақстан» айлығы аясында өткен бұл ауқымды шарада ақмолалық шаруалар жәрмеңке өткізіп, астаналықтарды арзан әрі сапалы азық-түлікпен жарылқап тастады. Аймақтың мәдени күндері аясында өткен екі күндік шараға Астана қаласының әкімі Әсет Исекешев пен Ақмола облысының әкімі Сергей Кулагин қатысып, аймақтың жетістіктерімен танысты.
«Хан Шатырдың» алдына жиналған жұртты «Көкшетау» мəдениет сарайының өнерпаздары мен облыстың 19 ауданынан сайдың тасындай іріктеліп алынған кіл жүйріктер мерекелік театрландырылған қойылым қойып, жырдан шашу шашып қарсы алды. Сонымен қатар, тоғызқұмалақ, асық ату, кір көтеру, қол күресі, дартс секілді ұлттық ойындар мен спорттық жарыстар ұйымдастырылды. Тайыншадай алабай, алғыр тазы секілді аңшы ит жетектеп, қолына сұңқар, лашын, бүркіт секілді жыртқыш құс қондырған саятшылар жұрттың көзайымы болды. Келушілер естелік суретке түсіп, қарық болысты.
Жұртты, әсіресе, ет, шұжық өнімдерінің арзандығы қатты таңқалдырып жатты. Мәселен, қой еті 950 теңге болса, сиыр еті – 1000, әдетте қара базардағы бағасының өзі 1200-1300 теңгеден түспейтін жылқы еті 1100 теңгеден сатылды. Бұл – қалада кездесе бермейтін баға. «Еті сондай сапалы, семіз екені көрініп тұр. Бірден 15 келі жылқы етін сатып алдым» дейді жәрмеңкеге келуші Бейсен есімді ақсақал.
Жұмыртқа да су тегін сатылды. Данасы небәрі 19 теңгеден. Бұл да қаланың еш жерінде кездеспейтін баға. Сол себептен болар, жұмыртқаға кезекке тұрушылардың қарасы тым көп. Ұзын-сонар кезек. Сондай-ақ, атақты Зеренді мен Шортанды ауданының емдік қасиеті мол балын алып жатқандар аз болмады.
Сүт өнімдері де арзан. Қаймақ – 650, сүзбе – 500, еш қоспасыз қолдың сары майы 1500 теңгеден саудаланды. «Өзім Амангелді ауданынанмын. Астанаға келгелі 9 жыл болды. Туған ауылға деген сағыныш па, білмедім?! Үйде отыра алмай, ала таңнан жәрмеңкеге тартып кеттім. Сүзбе алдым. Таңдап жүріп қаймақ, балымды алып, қайтып барамын. Көкөніс өнімдерінің бағасынан айтарлықтай айырмашылық байқамадым. Қалтамдағы ақшам жеткенше қалалықтар үшін таңсық ас – ақтамақ өнімдерін алып тұрмын» дейді Зейнеп есімді зейнеткер.
Айтпақшы, ереймендік шаруалар қымыз фестивалінің көркін қыздырды. Келген қонаққа тостақ-тостақ бал қымыз ұсынып, ыстық бауырсақтан дәм ауыз тигізді. Бұл да жәрмеңкенің ажарын ашқан жайт болды.
Жәрмеңкені ұйымдастырушылардың айтуынша, Ақмола облысының шаруалары елорда тұрғындарына жалпы құны 404 миллион теңге болатын 968 тоннаға жуық өнім әкелді. «Жалпы, елордаға 70-ке жуық өнім түрін әкеліп отырмыз. 605,2 тонна ет және шұжық өнімдері, 46 тонна сүт өнімдері, 218 тонна көкөніс, 19 тонна балық пен балық өнімдері, 403 мың дана жұмыртқа, 200 тонна картоп, 45 мың литр өсімдік майы және тағы басқа да тауарлар бар. Бағалары астаналық сауда нысандарымен салыстырғанда 15-20 пайызға арзан. Ең бастысы, сапалы әрі қауіпсіз. Барлығы – Арқа төрінің еңбекқор шаруаларының өз қолдарымен өндірген өнімдері» деді Ақмола облыстық Азық-түлік басқармасының басшысы Мұрат Балпан.
Бүркіт НҰРАСЫЛ