استانا قالاسىنىڭ تۋريزم, دەنە تاربيەسى جانە سپورت باسقارماسى بيىلعى جىلدىڭ جازعى سپورتتىق ماۋسىمى جابىلۋىنا وراي جەڭىل اتلەتيكادان ءداستۇرلى «التىن كۇز» فەستيۆالىن وتكىزدى. «دوستىق» سپورت كەشەنىندە وتكەن مەرەكەلىك جارىسقا 700-گە جۋىق ادام قاتىستى.
ەلوردامىزداعى بۇقارالىق سپورتتى ۇيىمداستىرۋدى جۇزەگە اسىراتىن «ۇلتتىق سپورت تۇرلەرى جانە بۇقارالىق ساۋىقتىرۋ-دەنە شىنىقتىرۋ كلۋبى» ايتۋلى شارانى وتكىزۋ بارىسىندا تەك جەڭىل اتلەتيكامەن شەكتەلىپ قالماي, قاتىسۋشىلاردىڭ كوڭىل-كۇيىن كوتەرۋ ماقساتىندا باسقا دا سايىستار ۇيىمداستىرىپ, «التىن كۇز» فەستيۆالىن ناعىز بۇقارالىق شاراعا اينالدىرا ءبىلدى. اتاپ ايتقاندا, بىرنەشە قاشىقتىقتارعا جۇگىرۋمەن قاتار نىسانا اتۋ, ارقان تارتىس, بۇقا تارتىس, كىر تاسىن كوتەرۋ, توعىزقۇمالاق, شاحمات جانە قول كۇرەسىنەن قىزىقتى سايىستار دا ءوتتى.
مەكتەپ وقۋشىلارى, ستۋدەنتتەر, اسكەري قىزمەتكەرلەر, مەملەكەتتىك مەكەمەلەر قىزمەتكەرلەرى قاتىسقان جەڭىل اتلەتيكا جارىستارىندا جاس شامالارىنا قاراي ءا.تولەگەنوۆ, ن.سۇلەيمەنوۆا, ا.كولەسنيكوۆ, ت.ماكالكينا, ب.سەرىكوۆ, ق.وتاروۆا, ت.امانتاەۆ, ك.باراننيك جانە ع.شالاباەۆ جەڭىمپازدار اتاندى. بارلىق جەڭىمپازدارعا استانا قالاسىنىڭ تۋريزم, دەنە تاربيەسى جانە سپورت باسقارماسى اتىنان ديپلومدار مەن مەدالدار تاپسىرىلدى. ال وسى شاراعا دەمەۋشىلىك كورسەتكەن «بيلاين» كومپانياسى ارنايى سىيلىقتار تاعايىندادى.
سونىمەن, ەلوردامىزدا جازعا سپورت ماۋسىمى جابىلدى. ەندى استانالىق اۋەسقوي سپورتشىلار قىسقى سپورت تۇرلەرىنەن سايىستارىن كۇتەدى.
