ӘСКЕРИЛЕР ТІЛ САЙЫСТЫРДЫ
Қазақстан халқы тілдерінің мерекесіне орай ҚР Қарулы Күштері Құрлық әскерлері бас қолбасшысы басқармасында «Мемлекеттік тіл – менің тілім» атты ұлты өзге әскери қызметшілер арасында байқау өтті. Шара алдында басқарманың мемлекеттік тілді дамыту бөлімінің бастығы Манарбек Ибраһим сөз сөйледі.
«Баһадүр Бауыржан атамыз тілі кедей елді мәдениетсіз, анайы, надан халық деп санайды. Ал қазақ тілі – өзінің даласындай кең пішілген жайдары да жалпақ тіл. Қазақ сөзі қашанда даланың қоңыр желіндей аңқылдап еркін есіп тұрады. Қазақ тілінің биязы мақамы – домбыраның күмбір қаққан сазындай. Қазақ тілі – дамыған, жетілген, бай тіл. Бұл сөзімізді шығыстанушы В.Радловтың: «Қазақтардың тілі жатық та шешен әрі өткір, көбіне іліп-қағып, таңғаларлықтай оралымды сөйлейді» дегені растайды. Ұлы Абай да: «Өткірдің жүзі, кестенің бізі, өрнегін сендей сала алмас» деп бекер айтпаған. Сол себепті, ана тіліміздің қадір-қасиетін бағалап, ұрпақтан-ұрпаққа қаймағы таза күйінде жеткізу – баршамызға парыз» деді подполковник М.Ибраһим.
Еліміздің әр өңірінде өткен конкурстардың жеңімпаздарынан жасақталған сегіз үміткер сайыста төр аталым бойынша сынға түсті. Қатысушылар алғашқы кезеңде өзін ән мақамымен, өлеңмен таныстырса, келесі бәсекеде белгілі ақын-жазушылардың шығармаларын мәнерлеп оқыды. Үшінші сында сөз және сөз тіркестерін орыс тілінен мемлекеттік тілге, мемлекеттік тілден орыс тіліне аударды. Соңғы аталымда әскери салаға қатысты сұрақтарға жауап беріп, біліктіліктерін ортаға салды.
Байқаудың нәтижесінде елордалық тіл жанашырларынан құралған әділқазылар алқасы кеңесе келе, бас жүлдені №58012 әскери бөлімінің қызметкері, лейтенант Айина Лаврентьеваның қанжығасына байлады. «Менің бар болмысым қазаққа тартып кеткен сыңайлы. Өйткені, үй ішінде қазақ тілінде сөйлесеміз, қазақ ұлтының кейбір салт-дәстүрлерін ұстанамыз. Елбасы «Қазақстандықтардың бір ғана отаны бар, ол – Қазақстан» деді ғой. Расында, менің Отаным – тек қазақ елі. Бұл жеңісім – осының айғағы» деді А.Вадимқызы.
Екінші орын №10228 әскери бөлімінің қатардағы жауынгері Вадим Коротышқа бұйырды. «Батыс» өңірлік қолбасшылығы әскерлерінің кіші сержанты Дмитрий Кошелец үшінші орынды иеленсе, «Оңтүстік» өңірлік қолбасшылығы әскерлерінің сержанты Любовь Тектібаева ынталандыру сыйлығын місе тұтты.
Жеңімпаздарға ұйымдастырушылар тарапынан дипломдар мен сый-сияпаттар табыс етілді.
Асан ЫСТЫ