«Астана» баскетбол клубы ВТБ бірыңғай лигасының қорытынды ойынында Саратовтың «Автодорын» қабылдап, 75:92 есебімен ұтылды.
Елордалық команда жеңіске жеткен жағдайда плей-офф сериясына өту мүмкіндігі сақталар еді. Бірақ «Автодордың» алаң иелеріне қарағанда асығы алшысынан түсіп, 5-орынға нықтап орнықты.
Бас-аяғы төрт кезеңнің үшеуінде қонақтар басымдық танытты. Алайда «Астана» соңғы кезеңге дейін қарсыласын алысқа ұзатпай, басып озуға болатындай ойын көрсетті. Үлкен үзілісте табло ресейлік команданың пайдасына 41:39 есебін көрсетіп тұрды. Матчтың қалған бөлігінде астаналықтардың айласы таусылып, қонақтар бәрібір «төрді» бермеді.
Осылайша «Астана» ВТБ лигасындағы жорығын аяқтады. Яғни, баскетбол маусымы да тәмам болды.
Бексаттар САТТАР
