МЕКТЕПТІН МЕРЕЙТОЙЫ
Бұрын…
Мектеп ашылған 1993 жылы бас-аяғы 1109 оқушыға 63 қана мұғалім сабақ берді. Сол кезде бірінші сыныпқа 240 бала қабылданған болатын.
Бүгін…
Мектепте барлығы 79 сынып бар. 2177 оқушыға 123 мұғалім сабақ беруде. Биылғы жаңа оқу жылында 300 жеткіншек бірінші сыныптың табалдырығын аттады.
Жалпы алғанда…
Жиырма жыл ішіндегі жетістікке сүйенсек, мұндағы 19 түлек оқуын «Алтын белгімен», 45-і үздік аттестатпен аяқтаған. Еңбек ұжымында 39 жоғары және 41 бірінші санатты мұғалім жұмыс істейді.
Таяуда Астанадағы Сырбай Мәуленов атындағы №37 орта мектептің құрылғанына жиырма жыл толды. Оқу ордасының жиналыс залында өткен мерейтойға мектеп ұжымымен қатар, Алматы ауданы әкімінің орынбасары Түсіп Рысбеков пен Әсима Бимендина бастаған Астана қаласы Білім басқармасының өкілдері қатысты.
Алдымен сахнаға қаз-қатар
тізілген мұғалімдер хормен патриоттық әндерді шырқады. Одан кейін мектеп директоры Базыл Ахмет ұлағатты ұстаздар ұжымын мерекемен құттықтап, ақжарма тілегін айтты. Ал, Білім басқармасының басшысы Әсима Бимендина озат оқушы тәрбиелеуде озық деп танылған тәлімгерлерді алғыс хатпен марапаттап, Базыл Әлдешұлына жиырма жыл бойы табанды еңбек етіп келе жатқаны үшін ризашылығын білдірді.
«Біз биылғы оқу жылын жақсы іс-шаралармен бастадық. Әсіресе, әр сенбі сайын барлық мектеп басшыларымен кездесу ұйымдастырып жүрміз. Міне, енді арнайы кесте бойынша өтетұғын кездесуіміз №37 мектептің жиырма жылдық мерейтойына сәйкес келіп отыр. Осынша жыл ішінде қаншама жастардың бұл мектептен қанат қағып шығып, елорданың қарқынды дамуына өз үлестерін қосып жатқаны білім беру ұжымының бақыты деп есептеймін. Бүгін мектептің мерейтойы қарсаңында осы мекеме ішінен патриоттық кабинет ашуға шешім қабылдадым. Ол үшін мұнда 700 мың теңге қаржы бөліп отырмыз. Астанада ондай кабинеттердің көбірек болғаны жөн» деді Әсима Темкеқызы.
Сондай-ақ, Алматы ауданының әкімдігі жиырма жылдыққа Астананың тарихы жазылған жиырма кітап сыйлады. Аудан әкімінің орынбасары Түсіп Рысбеков оларды мектеп директорына табыстап тұрып, әкім Бекбол Сағынның құттықтау хатын оқып берді.
Іс-шара одан әрі концерттік бағдарлама негізінде жалғасын тауып, мектептің алғаш ашылған кезінен бастап қызмет атқарып жүрген мәртебелі мамандар есте қалған қызықты оқиғаларын баяндай отырды.
Базыл АХМЕТ,
мектеп директоры:
– Бұл мектеп ашылған жылы біраз қиындықты бастан өткердік. Ғимаратқа жақын маңдағы шағын аудандарда орналасқан әр үйдің есігін қағып, оқушы балаларын жаңа мектепке берулерін өтініп жүрдік…
Ал, мектептің екі ай ішінде салынып, есігін айқара ашуына қоғамдық жұмысқа белсене араласқан жергілікті азаматтар – сол кездегі «Тіл және мәдениет» қоғамының төрағасы Алдан Смайыл, журналист-жазушы Амантай Кәкен, «Егемен Қазақстан» газетінің фототілшісі Орынбай Балмұрат төртеуміздің ықпалымыз болды десем, артық айтқандық емес. Ол кезде Астанада Жамбыл Жабаев атындағы №4 орта мектеп қана таза қазақша оқытты. Содан соң, 1991-1992 оқу жылдарында №36 қазақ орта мектебі ашылған. Кейін ол жабылып қалып, оқушыларының көбін бізге көшірді.
Бастапқыда таза қазақ мектебі болып ашылуы тиіс еді. Алайда, орыс сыныптары уақытша деп кіргізілді де, содан аралас мектеп болып қалдық.
Еркеғали БЕЙСЕНОВ