Мемлекеттік марапаттар тапсырылды
Кеше Астана қаласының әкімі Әділбек Жақсыбеков Жеңістің 70 жылдығына орай елордалық бір топ Ұлы Отан соғысы ардагерлері мен тыл еңбеккерлерін Қазақстан Республикасының мемлекеттік наградаларын тапсырды.
Жиналған қауымды Жеңістің 70 жылдық мерейтойымен құттықтаған қала басшысы: – Жеңіс күні – қасиетті де, қастерлі мереке. Отан үшін от кешкен қазақстандық жауынгерлер жеңіс күнін жақындатуға аз үлес қосқан жоқ. Сіздердің ерліктеріңіз, қаһармандық пен отансүйгіштік қасиеттеріңіз – кейінгі ұрпаққа үлгі-өнеге. Соғыстан кейін құлдыраған экономиканы қалпына келтіруге де ардагерлеріміз қажырлылықпен атсалысты. Осынау мейрам қарсаңында Елбасының Жарлығымен еліміздің өркендеуіне ерекше үлес қосқан азаматтарға жоғары мемлекеттік марапат тапсырылатын дәстүр бар. Биыл да бір топ астаналық ардагер сондай құрметке ие болып отыр, – деп атап өтті.
Бұдан кейін Әділбек Рыскелдіұлы мемлекет алдындағы ерен еңбегі, белсенді қоғамдық қызметі үшін және Ұлы Отан соғысындағы Жеңістің 70 жылдығының құрметіне орай соғыс ардагері Шағила Құсановаға «Парасат» орденін, майдангерлер Тезекпай Әбдірахмановқа, Владимир Кальсинге, «Ардагерлер ұйымы» республикалық қоғамдық бірлестігі Астана қаласындағы бөлімшесінің төрағасы Амангелді Сыздықовқа «Құрмет» орденін тапсырды. Қарт сарбаздар Баймұхан Әбілов, Бақтыбай Алмабеков, Александр Морунов, Шәріп Рахымжаров, еңбек ардагері Қали Мұқатаев, «Ардагерлер ұйымы» РҚБ Астана қаласындағы бөлімшесі төрағасының орынбасары Есболат Дүйсенов «Ерен еңбегі үшін» медальдарымен марапатталды. Ал соғыс ардагерлері Сихымбай Мамыров пен Жанияз Шалболовқа Қазақстан Республикасының Құрмет Грамотасы табысталды.
Осы күні марапатталғандардың бірі – Есіл ауданы мүгедектер қоғамының төрағасы Бақытжан Сәрсенбаев. Ол «Қазақстан халқы ассамблеясының – 20 жылдығы» мерейтойлық медалімен марапатталды.
– Сіздердің Отан үшін жасаған ерліктеріңіз ешқашан ұмытылмайды. Өздеріңіз сыйлаған бейбіт өмірдің арқасында еліміз үлкен жетістіктерге жетіп отыр. Аға ұрпаққа қашан да тағзым! Мерекелеріңіз құтты, дендеріңіз сау, отбастарыңыз аман болсын, – деп сөзін түйіндеді елорда әкімі.
Салтанатты жиынға қатысушылардың атынан сөз алған соғыс ардагері Тезекпай Әбдірахманов өздеріне деген мемлекеттің ілтипатына риза екендігін жеткізіп, алғысын білдірді.
Қымбат ТОҚТАМҰРАТ