Мүгедек балаларға – мейірім
Елордадағы «Салауатты Астана» емханалар желісінің «Жағалау» отбасылық денсаулық орталығы мүгедек балалар үшін Ашық есік күнін өткізді.
Ашық есік күніне келген 67 кішкентай пациент травматолог, жалпы практика дәрігері, невропатолог, стоматолог, ортопед-хирург және психологтан кеңес алды. Жалпы барлығы 198 бала – аталған орталық дәрігерлерінің бақылауында. «Олар біздің есебімізде тұр. Бұл – мүгедектігі расталған балалар. Олардан басқа, әлі қайта тексеруден өтпеген тағы 100-ге жуық бала бар. Яғни, барлығы 300-ге жуық бала» деді «Жағалау» ОКЗ психологы Вероника Амренова. Емханада 5-6 мүгедек бала тәрбиеленетін бірнеше отбасы бар. «Әр адамның өзіндік психикалық ресурсы болады. Сондықтан біз балалармен ғана емес, ата-аналармен де жұмыс істейміз, оларға психологиялық сессиялар өткіземіз. Олар өзгелердің яғни туыстарының, күйеуінің және қоғамның шабуылына өте сезімтал келеді. Сондықтан біздің қолдауымыз ата-аналар үшін, әсіресе аналар үшін өте маңызды» деді психолог. Ашық есік күні балаларға демеушілер, мейірімділер клубы және «Благодарю, Астана» қоғамдық қайырымдылық қорының атынан символикалық сыйлықтар табыс етілді, сондай-ақ ешкім ұтылмайтын лотерея ұйымдастырылды.