Оқушылар да қалдықты сұрыптайды
Тұрмыстық қалдықтарды бөліп тастауды насихаттау мақсатында елордалық мектептерде «Қайта өңдеу үшін сұрыпта» атты экологиялық шара ұйымдастырылды.
Бұл тұрғыда №14 мектеп-гимназияда оқушылар мен ата-аналар үшін қалдықты бөлек жинауға арналған тақырыптық сабақ өтті. Аталмыш білім ордасындағы эко-шараға жергілікті билік өкілдері мен экологиялық ұйымдар және мектеп ұжымы, оқушылар, ата-аналар қатысты.
Білім басқармасы мен тұрмыстық қалдықтарды тасымалдаумен айналысатын «Clean City» компаниясы арасындағы қайта өңделетін қалдықтарды тастауға арналған контейнерлерді мектеп аулаларына орнату жөніндегі меморандум аясында қаладағы әр мектепке 2 сары контейнерден қойылуда. Бұл контейнерлерге оқушылар макулатура, пластик, шыны және басқа да өңдеуге жататын қалдықтарды тастайды. Шараға белсенді қатысып, ең көп қалдық тапсырған сыныптар анықталып, жеңімпаздарға бір себеттен алма берілді.