Қалаған емханаға қаралыңыз
Елімізде 2018 жылғы 15 қыркүйектен 15 қарашаға дейін азаматтарды бастапқы медициналық-санитарлық көмек көрсететін денсаулық сақтау субъектілеріне, яғни емханаларға тіркеу басталады.
Әрбір азамат өзінің қалауы бойынша кез келген емханаға тіркеліп, қызмет түрлерін ала алады. Ескеретін жайт, емхана таңдау барысында саналы түрде шешім қабылдап, оның үйіне, жұмыс орнына жақын немесе өзіне қолайлылығына назар аударуы шарт.
Емханаға тіркелу үшін әлеуметтік медициналық сақтандыру қорының қызмет көрсетушілер тізімінен емхананы таңдау қажет. Аталған тізім Қордың fms.kz сайтында орналасқан. Таңдау жасалғаннан кейін азамат ұйымның тіркеу бөліміне жеке куәлігімен келіп, бас дәрігердің атына өтініш жазуы қажет. Емханаға тіркелу барысында өтініш қабылданбайтын жағдайлар болады және оларды түсіністікпен қабылдаған жөн.
Біріншіден, бір дәрігерге тіркелген адам саны екі мыңнан асып кеткен жағдайда, өтініш жазған азамат медициналық қызмет көрсету аймағынан тыс жерде тұрып жатқан болса, оның өтініші қабылданбайды. Ал осы медициналық ұйымға қарайтын әкімшілік учаскесінің тұрғылықты тұрғынының өтініші ескеріледі.
Екіншіден, емхананың қызмет көрсететін учаскесінен тыс аумақта тұратын адам үйге дәрігер шақырту қызметінен бас тартуға келіспеген жағдайда, ол азамат дәл осы емханаға тіркеуге тұра алмайды. Өйткені медицина мамандары дер кезінде науқастың үйіне көмек көрсету үшін берілген уақыт ішінде жаяу жетіп үлгермейді.
Емханаға тіркелудің екінші жолы – онлайн тәртіпте, egov.kz порталы арқылы. Ол үшін азаматтың электрондық цифрлық қолтаңбасы болғаны жеткілікті.
Қазақстанда тұрақты тұрып жатқан шетел азаматтары мен азаматтығы жоқ тұлғаларға келетін болсақ, олар емханаларға кедергісіз тіркеле алады.
Азаматтар басқа БМСК ұйымына тұрғылықты мекенжайын, жұмысын, оқу орнын ауыстырғанда, жазасын өтеу мерзімі аяқталғаннан кейін, әскери қызметін өтеп болғаннан кейін, алғашқы медициналық-санитарлық көмек ұйымы қайта ұйымдастырылғанда немесе таратылған жағдайда, сонымен қатар, бұрынғы емханадағы қызмет сапасы көңілден шықпайтын болса, басқа емханаға тіркеле алады.
Естеріңізге сала кетсек, ӘМСҚ медициналық мекемелердің қызмет көрсету сапасын бағалау мақсатында «МСҚ: Халықтық бақылау» мобильді қосымшасын іске қосқан болатын. Мобильдік қосымша азаматтар үшін емхана таңдау мәселесін едәуір жеңілдететіні сөзсіз.
«Елордада кепілдендірілген тегін медициналық көмек көрсету аясында тұрғындарға 51 ұйым қызмет көрсетеді. Бұл көрсеткіш алдыңғы жылмен салыстырғанда едәуір өсті» дейді Астана қаласы бойынша «Әлеуметтік медициналық сақтандыру» қорының КЕАҚ филиалы директорының орынбасары А.Амангелдиев.
ДЕРЕК ПЕН ДӘЙЕК
Астана қаласы Қоғамдық денсаулық сақтау басқармасына қарасты 37 медициналық мекеме жұмыс істейді.
Жыл сайын:
Елордада 30 000-ға жуық нәресте дүниеге келеді.
Басқа аймақтардан келіп емделетіндер 65 000-нан асады.
Астанада емделіп жатқан әрбір 3-ші науқас қаладан тыс жерде тұрады. Елордада өмір сүру ұзақтығының көрсеткіші – 76,2 жас.
Елорданың 20 жылдығында туу көрсеткіші 2,3 есеге өсті
өлім деңгейі 2,8 есеге төмендеді
туберкулезден өлім – 18,6 есе
миокард инфарктісінен – 4,1 есе
ана өлімі – 11,8 есе
сәби өлімі 3,5 есе төмендеді.
2018 жылдың бірінші жартысында қала ауруханаларында 25 000-нан аса пациент емделді.
4 500-ден аса ота жасалды
тұрғындар жедел жәрдем қызметіне 190 000 рет жүгінді
тегін дәрі-дәрмек 60 000-нан аса пациентке берілді
217 000-нан аса адам бірыңғай ақпараттық медициналық call-орталығына жүгінді.
«SMART Meдицина» жобасы бойынша 800 000-нан аса медициналық құжаттар электрондық форматқа көшірілді.
Астана тұрғындарының 93%-ы электронды денсаулық паспортына ие болды.