ҚҰРМЕТ ТҰҒЫРЫНДА – ҚҰТҚАРУШЫЛАР
Кеше елордада Құтқарушылар күніне орай «Қауіпсіздік әр үйге» ұранымен марафон ұйымдастырылды. Шараға қатысушылардың жауынды күн райына қарамастан көңіл-күйлері көтеріңкі болды. Олардың қатарында астаналық ТЖД, «ӨС және АҚЖҚ» ММ, «Өрт сөндіруші» АҚ қызметкерлері бар.
Старттағы жүгірушілер де қарапайым қызметкерлер емес, тәуелсіздік құрдастары. Отыздан астам қатысушылардың бәрі жүлделі орындарға лайықты. Сонымен қатар, марафон барысында елордалық құтқарушылар өз қызметтерін атқаруда пайдаланатын күш-құралдары қатарындағы арнайы техникалардың көрмесін ұйымдастырды.
Шара барысында елорда тұрғындары мен қонақтарына «Жас құтқарушы» клубының оқушылары мен еріктілер өрт қауіпсіздігі ережелері туралы жадынамаларды таратты. Өйткені өрт қауіпсіздігі ережелерін қандай жағдайда да қаперден тыс қалдыруға болмайды, әсіресе, адам көп шоғырланатын орындарда.
Қатысушылар бес шақырым қашықтықты жүгіріп өткенше, ұйымдастырушылар қонақтарды ел Тәуелсіздігінің 25 жылдығына арналған мерекелік концертпен қуантты. Сөз кезегін алған Астана қаласы Төтенше жағдайлар департаменті басшысының міндетін атқарушы, азаматтық қорғау полковнигі М.Қайсанов көпшілікті ел егемендігінің мерейтойымен құттықтап, қатысушыларға сәттілік тіледі. Спорттық жарыстың нәтижесінде В.Мурашкин бірінші орынды жеңіп алса, М.Шахметов екінші орынды еншіледі. Ал үшінші орынды З.Оспанов місе тұтты. Қыздар арасында К.Баранник топ жарды.
Асхат РАЙҚҰЛ