ТҰРҒЫНДАР ТІЛЕГІН АЯҚСЫЗ ҚАЛДЫРМАУҒА ТЫРЫСАМЫН
Қайрат ЖАУХАНОВ, Астана қаласы мәслихатының депутаты:
Елбасы тапсырмаларын басшылыққа ала отырып, тұрғындардың өтінішіне құлақ асып қана қоймай, оларды орындап жүрген депутаттар жетерлік. Солардың бірі – «Астана» Халықаралық әуежайы» АҚ президенті, қалалық мәслихаттың депутаты Қайрат Кеңесбекұлы Жаухановты әңгімеге тартқан едік.
– Қайрат Кеңесбекұлы, сайлаушыларыңызбен қоғамдық қабылдауларды дәстүрлі түрде өткізіп жүргеніңізді білеміз. Сонда қабылдауыңызға келушілерді нендей мәселелер мазалайды?
– Өткен жылы қоғамдық қабылдауымызға жүзден астам тұрғыннан өтініш келіп түсті. Бұлардың арасында ұжымдық өтініштер де болды. Олардың көбі тұрғын үй, жұмыспен қамту, балабақша мәселелері бойынша көмек сұрап, өтініш білдіріп келеді. Сонымен бірге тұрғын үй-коммуналдық шаруашылық мәселелері бойынша және саяжай тұрғындарына қатысты шешімін күткен шаруа да шаш-етектен. Тұрғындар тілегін шамам келгенше аяқсыз қалдырмауға тырысамын.
Мәселен, Пригородный елді мекеніндегі балабақшаға кір жуатын орын салып бердік және балалар алаңын абаттандырдық. Ал, саяжай алабының тұрғындарына бақшаларын суғаратын насостарын жөндеп бердік. Соның нәтижесінде көп адам мол өнімге ие болды. Осы маңдағы кейбір ағаштардың ұшарын кестік. Пригородный, Заречный және Тельман тұрғын алаптарында жолдар жөнделді. Сондай-ақ, 19-сайлау округінде орналасқан «Мейірімділік – М» қайырымдылық қорына үнемі көмек көрсетіп келеміз.
– Сайлаушыларыңыздың жұмыспен қамтылуына да қолұшын беріп отырады екенсіз. Жалпы, қанша адам жұмысқа орналасты?
– Иә, бұл мәселе де үнемі назарымда. Осы уақыт ішінде 20-дан астам адам елорданың әуежайына жұмысқа орналасты.
– Сіз сондай-ақ «250 орындық балалар жұқпалы аурулар ауруханасының құрылысы» партиялық постының жетекшісісіз. Осы бағытта қандай жұмыстар жүргізіліп жатыр?
– Бұл нысанның құрылыс жұмыстары 2008 жылы басталған болатын. Өкінішке қарай, ол әлі пайдалануға берілген жоқ. «Нұр Отан» ХДП тарапынан жүргізілген тексерістен кейін нысанның жұмысы бақылауға алынды. Соның нәтижесінде аталмыш нысанның құрылыс жұмыстары биыл үшінші тоқсанда аяқталатын болды.
– Елбасы «Қазақстан-2050» Стратегиясы: қалыптасқан мемлекеттің жаңа саяси бағыты» атты Жолдауында 2025 жылдан бастап әліпбиімізді латын әліпбиіне көшіруге кірісуіміз керектігін баса айтқан болатын. Бұл туралы пікіріңіз қандай?
– Өз басым латын алфавитіне көшу қазақ тілінің мәртебесін өсіреді деп ойлаймын. Елбасы айтқандай, біз қазақ тілін жаңғыртуға тиіспіз. Мемлекеттік тіл Қазақстанда тұратын барлық халықтарды біріктіретін болады. Бұл ретте біз тіл саясатын сауатты және дәйекті, бүкіл қазақстандықтар сөйлесетін бірде-бір тілге қысым жасамай жүргізуіміз керек.
Біздің елімізде мемлекет тарапынан қазақ тілінің позициясын нығайту мақсатында көп жұмыс атқарылып келеді. Бұл ретте мемлекеттік тілді кеңінен қолдану жөніндегі кешенді шараларды жүзеге асыру жалғасуда. Ұлт болып шешуге тиісті осы бір принципті мәселе біздің балаларымыздың болашағы үшін көтеріліп отыр. Себебі, осылайша біз әлеммен бірге түсуге, балаларымыздың ағылшын тілі мен интернет тілін жетік игеруіне, ал ең бастысы – қазақ тілін жаңғыртуға жағдай туғызамыз.
«Біздің міндетіміз – оны барлық салада белсенді пайдалана отырып дамыту. Біз ұрпақтарымызға бабаларымыздың сандаған буынының тәжірибесінен өтіп, біздің де үйлесімді үлесімізбен толыға түсетін қазіргі тілді мұраға қалдыруға тиіспіз. Бұл – өзін қадірлейтін әрбір адам дербес шешуге тиіс міндет» деді Мемлекет басшысы.
2025 жылға қарай қазақстандықтардың 95 пайызы қазақ тілін білетін болады. Бұл үшін біздің елімізде барлық жағдай жасалған. Қазірдің өзінде оқушылардың 60 пайыздан астамы мемлекеттік тілде оқиды. Ендігі жерде әрбір қазақ өзінің ана тілінде сөйлеуге ұмтылса, тіліміз Ата Заңымыздағы мәртебесіне лайық орнын иеленеді.
Гүлбаршын ӨКЕШҚЫЗЫ