ҚР Ұлттық спорт қауымдастығының ұйымдастыруымен өткен «Алтын тұғыр-2018» салтанатты жиында ұлттық спорттың үздіктері марапатталды.
Шара барысында Ұлттық спорт қауымдастығының президенті Бекболат Тілеухан сала мамандарымен есептік кездесу өткізді. Жиында қауымдастықтың жаңа құрамы таныстырылды. Қауымдастыққа қарасты «Көкпар» федерациясының президенті болып танымал боксшы, Олимпиада ойындарының жүлдегері Мұхтархан Ділдәбеков, «Аударыспақ» федерациясының президенті болып кәсіпкер Данияр Қобыландин, ал «Бәйге» федерациясының президенті – Ұлттық қауымдастықтың вице-президенті болып Нұрбол Назарбаев тағайындалды. Мұхтархан Ділдәбеков пен Данияр Қобыландин өздерінің жаңа қызметтегі алдағы жоспарлары туралы айтып өтті. Ал Ұлттық спорт қауымдастығының атқарушы директоры Рахат Жақсыбай өтіп бара жатқан жылдағы атқарылған жұмыстар мен алдағы жылдың жоспары жайлы баяндады.
Елімізге белгілі сахна саңлақтарының концертімен өрілген, биыл алтыншы мәрте ұйымдастырылып отырған салтанатты шараға ҚР Мәдениет және спорт министрі Арыстанбек Мұхамедиұлы, ҚР Ұлттық спорт қауымдастығының құрметті президенті Қайрат Сатыбалдыұлы қатысты.
Онда биылғы ұлттық спорттың халықаралық бәсекесінде дара шыққан жеңімпаздар, яғни аударыспақтан ІІІ Азия чемпионатында, теңге ілу мен құсбегіліктен ІІ Азия чемпионатында, жамбы атудан XIV Әлем чемпионатында, көкпардан, тоғызқұмалақтан, асық атудан, қазақ күресінен халықаралық жарыстарда жүлделі орын иеленген спортшылар «Алтын тұғыр» сыйлығын иеленді.
Ұлттық спорт түрлерінің үздіктер номинациясы бойынша «Үздік мерген» Абзал Тулыбеков, «Үздік бәйге аты» Қаракөз атты жүйріктің иесі Артығали Миразов, шабандозы Бекзат Сәдуақас, «Үздік шабандоз» Бауыржан Мырзабаев, «Үздік көкпар командасы» – «Құлагер» командасы, «Үздік көкпаршы» Асланбек Сайдулла, «Үздік аударыспақшы» Шыңғысхан Ержанов пен Азамат Серғазин, «Үздік теңге ілуші» Мағжан Сапарбек, «Үздік құсбегі» Бабажан Берікболсын, «Үздік қазақ күресінің балуаны» Ерсұлтан Мұзаппаров, «Үздік тоғызқұмалақ ойыншысы» Әсел Далиева, «Үздік асық атушы» Мұхтар Ахметов деп танылды. Нұрлан Додай «Үздік жаттықтырушы», Ербол Еділбаев «Үздік жетекші», Гүлнар Базарханова «Үздік төреші» атағымен марапатталды. Қызылорда облысының әкімі Қырымбек Көшербаевқа «Елімжан» медалі, ал Дербіс Байділдаев пен Бағдат Мүптекеқызына, Жомарт Сабыржановқа және Өнербай Жанбалаға «Ұлттық спорт ардагері» медалі табыс етілді.
Ал «Астана ақшамы» газетіне ұлттық спортты үздік насихаттағаны үшін арнаулы жүлде берілді. Сонымен қатар ұлттық спорт саласының дамуына еңбек сіңірген бірқатар азаматтар Ұлттық спорт қауымдастығының арнайы дипломы, алғыс хаты және қаржылай сыйлықтарына ие болды.
