Жадымдағы жеті күн
Марат Омаров, Қазақстан Республикасы мәдениет қайраткері, сазгер:
Жалпы, соңғы аптада біршама қызыққа толы оқиғалар болып жатыр. Өзім, міне, күні кеше ғана Мәскеуде үлкен шығармашылық концертімді беріп келдім. Бағыма қарай кеш өте сәтті өтті. Одан Астанаға келуім үлкен мейрамдарға қызу дайындық кезімен тұспа-тұс келіп қалғаны. Соның бірі – әсем Астанамыздың туған күні. Соған байланысты менің «Арман қала – Астана» атты әнімнің де жарыққа шыққанына биыл 15 жылдың жүзі болыпты. Осыған орай, 2-10 шілде аралығында Қазақстанның түкпір-түкпірінен жас әншілерімізді шақыртып, елорда төрінде біршама концерттік бағдарламаларымызды ұйымдастырмақпыз. Қазіргі таңда шақыртумен әр облыстан келген талантты өнерпаздарды мен өз тобыма жинап жатырмын.
Тағы бір жаңалығым, жақында ғана маған «Астана жұлдызы» атты арнайы жобаға шақырту берілді. Бұл жобада Қазақстан Республикасына еңбегі сіңген мәдениет қайраткерлері мен көптеген жас таланттардың бір жылдың ішіндегі еңбектерін жинақтай отырып, 5 шілде күні қорытындысын Қазақстан Орталық залында жариялайды. Соған сарапшы ретінде маған бірнеше іріктеу нәтижелерін тапсырып отырған жайы бар. Мұнда тек жеке әншілер емес, топ, трио да қатыса алады. Бұл – ең алдымен біздің еліміз үшін өте қажетті жоба. Себебі, Қазақстан бүгінде саясат, экономика жағынан дамыған мемлекеттер қатарына еніп жатса, біздер мәдениет тарапынан осылай халықаралық деңгейге көтеруіміз қажет. Сол секілді тек республикалық деңгейде емес, әлемдік деңгейде көтеретін жас өнерпаздарымыз бар. Біздің мақсатымыз – сол тума таланттарды әлемдік деңгейге шығарып, еліміздің туын желбірете беру. «Бұлақ көрсең, көзін аш» дейді ғой. Сол секілді өзіміз жинаған тәжірибемізді шәкірттерге сіңіру – біз үшін қуаныш.