Кез келген адам айналадағы адамдардың денсаулығы күрт нашарласа, алғашқы медициналық көмек көрсете алғаны жөн.
Елордадағы жедел медициналық көмек мекемесінің қызметкерлері алғашқы көмек көрсету тәсілдерінің ішіндегі ең маңыздыларын түсіндірді.
«Алғашқы көмек беру бойынша ең керекті медициналық көмектің бірі қан кету кезінде көрсетіледі. Адамнан қан кетіп, тоқтамай жатқан жағдайда, өзіңізде бар ремень немесе шарфты алып, қан кеткен жердің жоғарғы жағынан байлау керек. Екіншіден, егер науқас тыныс алып жатқан болса, оны шалқасынан емес, бір қапталына қарата жатқызған жөн. Себебі құсып қойған болса, шалқасынан жатқан адам сол құсығына өзі тұншығып, аспирация болуы мүмкін» деді Нұр-Сұлтан қаласы әкімдігінің қалалық жедел медициналық көмек стансасының фельдшері Айдос Колхозов.
