Л.Гумилев атындағы Еуразия ұлттық университетінде Қазақстан тарихы мен мәдениетіндегі өзіндік орны бар дін ғұламаларының өмірі мен шығармаларын зерделеу бағытында айтарлықтай бірнеше шара өтті. Оның бірі Ислам ынтымақтастығы ұйымы жанындағы ислам тарихын, өнерін, мәдениетін зерттеу орталығы қолдауымен «Сәдуақас Ғылмани және Ұлы даланың ғұламалары» тақырыбында халықаралық конференция болса, Сәдуақас Ғылманидың «Заманымда болған ғұламалардың өмір тарихтары» атты еңбегінің ағылшын тіліне аударылған және өзінің араб қарпімен жазған түпнұсқасының жарық көрген басылымдарының тұсаукесері болды.
Кітапты ағылшын тіліне аударған – Индиана университетінің профессоры Ален Франк, кітап қазіргі күні халықаралық амазон жүйесі арқылы Америкада, Еуропаның Орта Азия елдеріндегі ислам тарихын зерттеушілерінің арасында сұранысқа ие болып, ғылыми айналымға тез енді.
Осы шараны ұйымдастырушы университет проректоры Дихан Қамзабекұлы дін ағартушысының артында қалдырған мұрасын жаңғыртудағы атқарылған істерге тоқталып, Сәдуақас Ғылманидың қызы Үкіжан апаға оқу ордасының «Күлтегін» естелік медалін табыс етті. «Мені әкесінің жақсылығын естісін деп Жаратқан 96 жасқа жеткізіпті. Әкем өмір бойы екі тізесінің үстіне қағазын қойып, қолынан қаламы түспей ізденумен өтіп еді. Сол жазбалары өшпей, бүгінгі ұрпақтың да, келер заманның қажетіне жарағанын көргеннен артық бақыт жоқ. Халқым аман болсын, еліме тыныштық тілеймін» деді Үкіжан апа. Жиынның қонағы болған бас мүфти Серікбай қажы Сатыбалдыұлы қазақ топырағында діни ағарту мектебінің ежелгі дәстүріне шолу жасап, осы жолдағы ағартушылардың бірі Сәдуақас Ғылманидың да басты ұстын ретінде иман негіздерін алғанын айтты. Сол күнгі басқосуды ұлттық рухани құндылықтарын насихаттаудың тамаша үлгісі ретінде бағалады. Қоғам және дін қайраткері халық арасында Сәкен қалпе деп құрметпен аталған діндар ғалымның руханиятымызға қосқан өлшеусіз еңбегі дін әдебиетіндегі мәулет шариф жанрын жаңғыртушы. Оның қаламынан туындаған мәуліт жырын бүгінгі күнде ҚМДБ жыл сайын өткізілетін пайғамбарымыздың туған күніне арналған мәуліт кешінде айтылып жүргенін білдік.
Салтанатты жиыннан кейін халықаралық конференцияның жұмысы Сәдуақас Ғылманидың өмірі мен шығармашылығы, Қазақстандағы ислам мәдениетінің тарихы, ислам зияткерлік дәстүрін зерттеу әдіснамасы төңірегіндегі ғалымдардың жасаған баяндамаларымен жалғасты.
