Химиядан халықаралық Менделеев олимпиадасы 23-29 сәуiр күндерi Назарбаев университетiнде өтетiнiнен бүгiнге дейiн БАҚ арқылы хабардар болғанбыз. Бiлiм додасына санаулы күндер қалды. Мұнда елiмiздiң де намысы сынға түседi. Осы орайда, айтулы шараны ұйымдастырудың басы-қасында жүрген Республикалық «Дарын» ғылыми-тәжiрибелiк орталығының директоры Шолпан Қирабаеваны әңгiмеге тарттық.
– Кезектi олимпиаданың бұрынғылардан ерекшелiгiн атап айтасыз ба?..
– Бұл олимпиаданың басты ерекшелiгi, шараға бұрын-соңды қатыспаған Венгрия, Грузия, Эстония, Литва, Индонезия, Германия және Франция оқушылары мен жас химиктерiнiң құрамалары келедi. Негiзiнен бiлiм жарысына ТМД елдерiнiң, Оңтүстiк-шығыс Азия, Балтық жағалауы мемлекеттерiнiң оқушылары дәстүрлi түрде қатысып отырады. Биыл олимпиадаға қатысу үшiн 120 бала Астанаға ат басын тiрейдi деп күтiлуде.
– Оның iшiнде өзiмiзден?..
– Қазақстан құрамасының сапына елдiң әр аймағынан сұрыпталған 15 оқушы кiрдi. Олардың барлығы – химия олимпиадаларында бiрнеше рет жүлде алған жеткiншектер.
– Айтқандай, олимпиаданың тарихына аздап тоқтала кетсеңiз…
– Химия пәнiнен Халықаралық Менделеев олимпиадасы 1956 жылдан берi үзбей жалғасып келе жатқан дәстүрлi шара. Олимпиада Астана қаласында алғаш рет өтпек. Ал, осыдан 10 жыл бұрын Алматыда ҚазҰУ-нiң базасында ұйымдастырылған болатын. Атаулы шара ҚР Бiлiм және ғылым министрлiгiнiң Химия мен биологияның 1-құрылтайы қарсаңында өтiп жатқандығын да айтқым келедi.
– Ендi екi теориялық, бiр тәжiрибелiк кезеңнен тұратын жарысқа дайындық барысы қалай?
– Бүгiнгi таңда Қазақстанның брендiне айналған Назарбаев университетiнiң базасында өтетiн тәжiрибелiк сынақтарға қажеттi химиялық құрал-жабдықтар сатып алынды. Қатысушыларды жарыстан тыс уақыттарда Астана қаласында, Көкшетауда қыдырту жоспарланып отыр. Олар өзiмiздiң «Ханшатырды», «Бәйтеректi», «Думанды», басқа да көрiктi, қызықты нысандарымызды тамашалап, «Балдәурен» демалыс орнына барады. Онда спорттық шаралар, интеллектуалдық ойындар ұйымдастырылады. Қысқасы, Менделеев олимпиадасын өткiзуге тас-түйiн әзiрмiз.
