«Мичурин» тұрғын алабындағы №10 көпшілік кітапхана мен №43 орта мектеп-қосымша білім беру орталығы кітапханашыларының бірігуімен «Қыз өссе – елдің көркі» кітабының авторы, «Қызғалдақ» қыздар клубының жетекшісі Әсел Қайратқызымен кездесу өтті.
«Әйел – ана, әйел – жар, әйел – қайраткер» тақырыбымен өткен кездесу барысында тәрбие, мінез туралы, салт-дәстүр, сұрақ-жауап айдары арқылы ұлттық нақыштағы ою үлгісіндегі киім, әшекейді дәріптеу сияқты ұлттық құндылықтар жайында әңгіме болды. №43 орта мектеп-қосымша білім беру орталығы директоры Н.Жағабаев кездесуді ұйымдастырушылар мен қонаққа алғыс айтып, аталмыш тұрғын алапта осындай тәрбиелік мәні бар шараларды өткізуді қолдайтынын жеткізді. 5-8-сынып оқушылары өз ойымен бөлісіп, көкейде жүрген сауалдарды қойды. Қос мекеме атынан Әсел Қайратқызына алғыс хат тапсырылып, «Қыз өссе – елдің көркі» кітабы автордың қолтаңбасымен кітапханаларға сыйға тартылды.
«Ертеңгі жастар – осы отырған жеткіншектер. Олай болса білгенімізбен бөлісіп, дұрыс жол көрсету – міндетіміз» деді Әсел Қайратқызы.
Сондай-ақ жақында №10 көпшілік кітапхана №43 орта мектеп-қосымша білім беру орталығы бірігіп, «Астана – есірткісіз қала» айдарымен «Жаңа ғасырдың дені сау ұрпақтары» тақырыбында дөңгелек үстел мәжілісін өткізді. Ондағы басты мақсат – жас ұрпақтың салауатты өмір салтын қалыптастырудағы ой-өрісін дамыту, зиянды әдеттерге әуес болуы өміріне қауіпті екенін ескерту.
Жиын барысында психолог маман Гүлнұр Жамбылқызы тренинг өткізіп, медбике кеңес берді. Әлеуметтік педагог Гүлнұр Қажымұратқызы ой-тренинг ұйымдастырып, тақырып бойынша суреттер көрмесіне қатысқан оқушылар марапатталды.
