Жастар саясаты орталығы қоғамдық қорының ұйымдастыруымен «Аjar-Astana Mall» сауда ойын-сауық орталығында «Sportfest» фестивалі өтті.
Салауатты өмір салтын насихаттап, өскелең ұрпақты спортқа баулуды көздеген игі бастамаға Астана тұрғындарынан бөлек, Қарағанды, Көкшетау, Екібастұз қалаларынан келген 10-25 жас аралығындағы 400-ге жуық адам үн қосты. Көпшілігі әлеуметтік желілерде жазылған хабарландыру бойынша жиналған көрінеді.
Фестиваль жұмысы «Graffiti», «Break dance», «Parkour», «Street workout» атты 4 бағытта жүргізілді. Оның ішіндегі брейк-данс «Kids», «Junior» және «Professional» деген санаттардан тұрды. Сондай-ақ, қатысушылар аяқтарына 32 келі гір тасын байлап, белтемірге тартылудан жарысқа түсті. Арнайы әкелінген қабырғаларға спорт тақырыбында түрлі-түсті бояу мен сияның көмегімен сурет салды. Жақсы салынған суреттер жетімдер үйіне сыйға тартылады.
Жарыс соңында жеңімпаздарға
дипломдар мен түрлі бағалы сыйлықтар берілді. «Алғаш рет өткізілген бұл фестивальге қызығушылық танытқандар қарасы аз болмағандықтан, осы тектес шараларды алдағы уақытта да ұйымдастырамыз» дейді Жастар саясаты орталығы басшысының орынбасары Тынышқали Сәбен.
Мәдина ЖАҚЫП
