Елорданың 20 жылдығы мерекесінің аясында Сарыарқа ауданында бірнеше саябақтар салтанатты түрде ашылды. Солардың бірі – Республика даңғылы мен Ықылас Дүкенұлы көшесінің қиылысында, екіншісі Біржан сал көшесіндегі №5 үйдің жанында орналасқан. Елорда әкімдігінің ресми сайты хабарлағандай, Байқоңыр ауданында да бір саябақтың құрылысы аяқталып, пайдалануға берілді.
Атап айтарлығы, әрбір саябақтың аумағы абаттандырылған, балалар ойнайтын және спорттық алаңдар бар. Барлық саябақтар бұзылған және апатты үйлердің орнына салынған. Сәулеттік құрылымына сәйкес, әр саябақтың қайталанбас стилі бар. Мысалы, оларға «Қиял саябағы», «Шабадан саябағы» деген атаулар берілген. Алғашқысында скейтдром, Эймс бөлмесі, балалар сырғанағы, ойын алаңы көздің жауын алады. «Шабадан саябағы» теміржол вокзалына жақын орналасқан, сол себептен шағын сәулеттік формалар шабадан үлгісінде жасалған. Сол жерде балалар теміржолы да бар.
Сондай-ақ, Пушкин көшесінде балалар алаңқайы, спорттық жабдықтары орнатылған саябақ ашылды. Жергілікті тұрғындар асық атудан жарыс өткіземіз деп мәз болуда. Бұдан бөлек, Астана күнінде тағы 5 саябақ ашылды. Олар Әлия Молдағұлова көшесіндегі №19, 21 үйлердің ауданында пайда болды. «Ауыл шаруашылығы саябағы» деп аталған нысандағы балалар ойын алаңы, шағын сәулеттік формалар жануарлар мен өсімдіктер кейпінде бейнеленген. Басқа саябақтар Жеңіс даңғылындағы №36/1, Ілияс Есенберлин көшесіндегі №36 үйдің, Желтоқсан көшесіндегі №2 үйдің жанынан бой көтерді. Барлық саябақтарға канализациялық, инженерлік және су құбыры желілері тартылған. Кейбір саябақтарда футбол, баскетбол алаңдары қоса салынған.
