Астанада 3-жылу-электр орталығының құрылысы тым созылып кетті. Қалалық мәслихаттың Құрылыс, экология, көлік және тұрғын үй-коммуналдық шаруашылық мәселелері жөніндегі тұрақты комиссиясының отырысында депутат Еркеғали Есенжолов бұл нысанды дереу іске қосу қажеттігін айтты.
«Қалада құрылыс қарқыны қатты. Жаңа тұрғын үй кешендері бой көтеруде. Келесі жылыту маусымында энергиялық қуат жетпей қалуы ықтимал. Астанада биыл кемінде тұрғын үйдің 2 млн шаршы метрін пайдалануға беру жоспарланып отыр. Оған қосымша 200 гигокалория жылу энергиясы қажет» деді депутат.
Астана қаласының Отын-энергетикалық кешені және коммуналдық шаруашылық басқармасы басшысының міндетін атқарушы Ербол Төлеуовтың айтуынша, 3-ЖЭО-ны 2019-2020 жылдың жылыту маусымында пайдалануға беру көзделуде. Биыл нысанның бірінші іске қосу кешені құрылысын аяқтауға 6 млрд теңге бөлінді. Оған суды жылытатын төрт қондырғы кіреді. Бұл 440 гигокалорияны құрайды. Құрылысты аяқтау кестесі әзірленді. 3-ЖЭО-дан басталатын жаңа коллектордың құрылысына қажет жобалық-сметалық құжаттама да дайын.
Депутаттар 3-ЖЭО-ны пайдалануға беруге қатысты тағы бірнеше сұрақты қойды. Бұл мәселенің нақты шешімін табу үшін аталмыш басқарма басшылығының қатысуымен бөлек отырыс өткізуді ұйғарды.
Мәслихат депутаты Ирина Манжанова 85-көшенің тұрғындары өздері тұратын ауданда жолдың салынуын бірнеше жыл сұрап жүргенін жеткізді. Сондай-ақ, Абай даңғылынан бастап, А.Пушкин көшесіне дейінгі аралықта А.Жұбанов көшесін қайта салуға назар аударды. Х.Досмұхамедұлы көшесіндегі «Социум» тұрғын үй кешені маңында аяқжол да, көлік жолы да жоқтығын, ең жақын аялдама 1100 метр қашықтықта жатқанын айтты. Автомобиль жолдары
басқармасының басшысы Асхат Қарағойшин аталған тұрғын үй кешенінің жағдайымен барып танысатынын жеткізді.
Баяндамашының бірі – Табиғи ресурстар және табиғатты пайдалануды реттеу басқармасы басшысының орынбасары Сәкен Исаевтың сөзінше, биыл қалада 14 шағын бақ салынады. Олар ескі және апатты жағдайдағы сүрілген үйлердің орындарында орналасады. Оның бірі Астананың 20 жылдығына орай Маңғыстау облысының бас қалаға тартуы ретінде Жеңіс және Бөгенбай батыр даңғылдарының қиылысында салынады. Бұған қоса, бұл жерде аталған облыстың тағы бір сыйы – Мәншүк Мәметованың ескерткіші бой көтереді.
Қалада биыл 34 шақырымды құрайтын велосипед жолдары да салынады. Оған 5 облыстың әкімдігі инвестиция құймақ. Баяндамашы депутаттарды Астананың жасыл белдеуін дамыту жоспарымен таныстырды. Депутаттардың тарапынан оған сұрақтар болмады.
Аманғали ҚАЛЖАНОВ
