Бұрнағы күні «Астана ЭКСПО-2017» ұлттық компаниясы мен «Парасат» Ұлттық ғылыми-технологиялық холдингі және Солтүстік Қазақстан облысының әкімдігі арасында ынтымақтастық туралы меморандумға қол қойылды. Құнды құжаттар тараптар арасындағы ынтымақтастықты арттырып, көрмеге қажетті жобаларды жүзеге асыруға мүмкіндік береді.
Меморандумға сәйкес, «ЭКСПО» көрмесінде қазақстандық ғалымдар дүниежүзілік алдыңғы қатарлы технологиялардан еш кем түспейтін әзірлемелерін көрсете алады. Қазірдің өзінде «Парасат» ұлттық холдингі күн және жел энергетикасы бағыттары бойынша түзілген жиырмаға жуық бағдарламаны қолға алды. Көрме аяқталған соң, «Астана ЭКСПО-2017» ұлттық компаниясы ұсынған жобалар мен макеттердің технологияларын өндірісте қолдануға мүмкіндік туады.
«ЭКСПО» көрмесінде қазақстандық ғалымдар әлем жұртшылығын қандай да бір ғылыми жетістігімен таң қалдырады деп айту қиын. Дегенмен, біздің ешкімді де бейжай қалдырмайтын, дүниежүзілік алдыңғы қатарлы технологиялардан кем түспейтін жобаларымыз бар. Мәселен, Алматыдағы физика-технология институтымен күн сәулесінен энергия алатын панельдерді әдеттегідей әйнектен емес, жұмсақ материалдардан жасау бағытында жұмыстар жүргізіп жатырмыз» дейді «Парасат» холдингінің басқарма төрағасы Әбдікәрім Зейнуллин. Оның айтуынша, отандық ғалымдар қуаты ұзаққа жететін аккумуляторлық батареяларды жасауды да қолға алған. «Бізде әлем бойынша сирек кездесетін металдардың мол қоры бар. Ал қуаты көпке жететін «болашақтың» аккумуляторлары дәл осы сирек металдар негізінде жасалады. Егер біз шикізатты да өзімізден шығарып, өнімді де өзіміз өндірсек, бәсекелес орта қалыптасып, аккумуляторлардың бағасы да арзандай түседі» дейді Ә.Зейнуллин.
Осылайша, меморандумға қол қойған тараптар «ЭКСПО» көрмесін қазақстандық ғалымдардың зерттемелерімен қамтамасыз ету үшін күш біріктіруге ниетті. Соған сәйкес, «ЭКСПО-2017» шеңберінде Қазақстан Республикасының таза қуат көздерін әзірлеу туралы» 2013-2017 жылдарға арналған бағдарлама бойынша инновациялық ғылыми-техникалық жобаларды жүзеге асыру және халықаралық мамандандырылған көрмеде оларды таныстыру жоспарланып отыр.
Бұдан бөлек, «Астана ЭКСПО-2017» ұлттық компаниясы Солтүстік Қазақстан облысы әкімдігімен де келісімшартқа отырды. Қос тарап көрмеде жоспарланған жұмыстарды жұмыла жүзеге асыруды көздейді.
«Елбасы жуырда ғана көрменің құрылысы мен жоспарланған іс-шараларды өткізуге отандық кәсіпкерлер атсалыссын» деді. Осы орайда, біз тек Солтүстік Қазақстан облысы ғана емес, еліміздің басқа аймақтарымен де келісімшартқа отырмақпыз» дейді «Астана ЭКСПО-2017» ҰК басқарма төрағасы Талғат Ермегияев. Оған қоса, компания басшысы ЭКСПО-2017 аясында қолданылатын тауарлар мен қызметтердің тізімі осы жылдың соңына дейін белгілі болатынын атап өтті.
Еркежан СӘТІМБЕК
