Л.Гумилев атындағы Еуразия ұлттық университетінде белгілі жазушы, ҚР еңбек сіңірген қайраткері, Халықаралық «Алаш» және «Жамбыл» сыйлықтарының лауреаты Тұрлыбек Мәмесейітпен кездесу өтіп, қабырғалы қаламгердің қайта көркемделіп басылған «Таңжарық» атты роман-диологиясының таныстырылымы болды.
Тұрлыбек ағамыз қазақ әдебиетіне өз соқпағымен келген жазушы. Оның «Беторамал», «Түсіме тау кіреді», «Бесік пен несіп», «Әулиешоқы», «Тектінің кегі», «Тау» және «Жасын түскен маусым» атты әңгіме-хикаяттары әдеби сыншылар мен оқырмандардың жылы бағасын алған.
Кез келген көркем сөз зергерінің жұртшылық ауыз толтырып айтатын сүйекті туындысы болады. Суреткердің сондай дүниесі – «Таңжарық» романы. Бұл шығармада Қытай жерінде ғұмыр кешкен айтулы ақын Таңжарық Жолдыұлының өмір жолы заман шындығымен өрілген. Кітап екі томнан тұрады.
Шара барысында академик Сейіт Қасқабасов пен профессор Әділ Ахметов жазушының шығармашылық шеберлігі жайында сөз сөйлеп, роман-диалогияның лентасын қиды. Сондай-ақ, Намазәлі Омашұлы, Тұрсын Сыдықов, Тұрсын Жұртбай, Қуаныш Жиенбай, Сүлеймен Мәмет секілді азаматтар кеш иесінің іргелі еңбегі туралы парасатты ой қозғады. Студенттер аталған романнан үзінді оқыса, Кенжеғали Мыржықбай тамылжытып ән салды. Л.Гумилев атындағы Еуразия ұлттық университетінің проректоры, академик Дихан Қамзабекұлы қаламгерді «Күлтегін» медалімен марапаттады. Кеш соңында Тұрлыбек ағаның өзі жиналған қауымға ризашылығын білдірді.
