Тұрғындарға – тегін ем
Жыл басынан бері Әлеуметтік медициналық сақтандыру қоры медициналық мекемелерге тұрғындарға көрсеткен қызметтері үшін 62,1 млрд теңге төледі.
Бұл сома – кепілдендірілген тегін медициналық көмек шеңберінде жалпы құны 86,6 млрд теңгеге бекітілген келісімшарттар сомасының шамамен 72 пайызы.
Қазіргі таңда Әлеуметтік медициналық сақтандыру қорының қалалық филиалымен келісімшарт жасасқан 82 мекеме бар. Олар мынадай қызметтер көрсетеді: стационарлық көмек, алғашқы медициналық-санитарлық көмек, консультативті-диагностикалық көмек, жедел жәрдем, жоғары технологиялық медициналық қызмет. Бұның ішіндегі 46 медициналық ұйым – жекеменшік. Өткен жылмен салыстырғанда жекеменшік емханалардың саны тағы 10-ға артты. Ал үш жекеменшік медициналық ұйыммен келісімшарт бұзылды.
«ӘМСҚ» КЕАҚ Астана қаласы бойынша филиалының директоры Н.Кабдықапаровтың айтуынша, медициналық ұйымдарға ақы төлеу кестеге сай жүріп жатыр. Бөлінген қаражат медициналық ұйымдардың операциялық шығындарын өтеуге, оның ішінде қызметкерлердің жалақысын төлеуге жеткілікті. Қор апта сайын стационарлық және стационар алмастырушы медициналық көмек көрсететін ұйымдар қызметтерінің сапасына электронды басқару жүйесі арқылы мониторинг жүргізеді. Бұл халық арасында сұранысқа ие медициналық қызмет түрін анықтауға да мүмкіндік береді.