Үйірмелер тегін үйретеді
Елордада «Замандас» атты отбасылық аула клубтары ашылды. Олар «Өндіріс» тұрғын алабындағы кітапхана мен №49 орта мектеп базасында орналасқан.
Айта кетейік, бұл аула клубтары «Samruk-Kazyna Trust» Әлеуметтік жобаларды дамыту қорының қолдауымен ашылған.
– Бұған дейін 3 аула клубын іске қосқан едік. Онда шамамен 2000-дай жеткіншек бос уақыттарын өткізетін. Сұраныс жоғары болғандықтан, шалғай аудандардың да қамын ойлап, тағы 2 клубтың тұсауын кестік. Мұнда келуші жастар үшін арт-терапия, хореография, шахмат, сәндік-қолданбалы өнер, авиамодельдеу, театр үйірмесі, каратэ, домбыра, ушу-кунгфу, брейк, вокал, мәнерлі сөйлеуді дамыту, тоғызқұмалақ, робототехника, ағылшын және қазақ тілі курстары секілді 20 түрлі үйірме бар, – дейді аталған қордың ресми өкілі Мирас Іргебаев.
Жоғарыда айтылғандардан бөлек, жаңадан ашылған «Замандас» аула клубтарының базасында ата-аналарға арналған «Бақытты отбасы» клубы да жұмыс істейді. Онда отбасында қолайлы жағдай жасауға, ересектер мен балалар арасындағы өзара түсіністікке бағытталған тренингтер мен консультациялар ұйымдастырылады.