Елорда тұрғындары Астана қаласы әкімдігінің алдындағы алаңда болашақ сарбаздарды әскер қатарына салтанатты түрде шығарып салды.
«Қарулы Күштер қатарында Отан алдындағы борышын өтеу мақсатында аттанып бара жатқан жастарды шығарып салу рәсімі Қазақстан Республикасы Тәуелсіздігінің 25 жылдығына арналып отыр. Осы бір мерейтойлы дата қарсаңында бір топ астаналықтарды Конституциялық борышын өтеуге шығарып салып отырмыз. Өздеріңіз байқап отырғандай, бұл болашақ сарбаздар – барлық сынақтар мен талаптарға сай келетін, әртүрлі деңгейдегі медициналық сынақтардан сүрінбей өтіп отырған жастар. Бір жылдың ішінде олар жан-жақты әскери дайындықтан өтіп, Отан қорғайтын нағыз азаматтар болып шығады деп сенемін» деп атап өтті Астана қаласы әкімінің орынбасары Андрей Лукин салтанатты шарада.
«Қазақстанның әр азаматының борышы – ел қорғау!» деген атаумен өткен шараға студент жастар, мектеп оқушылары, әскери-патриоттық клубтар мен үйірмелердің тәрбиеленушілері, сондай-ақ шақырылушылардың ата-аналары қатысты. Бас-аяғы 4 000-нан аса адам қатысқан шара барысында қонақтар назарына құрмет қарауылы ротасының дефилесі арнайы қойылым ұсынып, концерттік бағдарлама көрсетілді.
«Мұндай шаралар ҚР Қарулы Күштерінің имиджін көтеру және жас буынның әскерге деген құрметі мен қызығушылығын ояту бағытында ұйымдастырылып отыр. Азаматтардың мерзімді әскери қызметке шақырылуының күзгі шақырылымы елімізде 1 қазанда бастау алғанын білесіздер. Соның алғашқы легі ретінде елордамыз Астанадан 72 жас сарбаз аттанып бара жатыр. Оның 50-і Аэро-ұтқыр әскери бөлімдер қатарына жіберіліп отырса, тағы 22 жас еліміздің Мемлекеттік күзет қызметі әскери бөлімін толықтырғалы отыр» дейді Астана қалалық Қорғаныс істері жөніндегі департаменті басшысының орынбасары Ғани Артықов.
Салтанатты шара соңында Қорғаныс министрінің бірінші орынбасары – ҚР Қарулы К-үштері Бас штабының басшысы Мұрат Майкеев құттықтау сөз сөйлеп, жас сарбаздарға ақ жол тіледі.
Бүркіт НҰРАСЫЛ
